DJ SoSo - 尖沙咀長途遊及IMAX哈7－The road to success is always under construction.

"DJ SoSo 私家音樂部落"

前日,Amy Winehouse證實倒斃家中,終年27歲.對於佢既死,其實我唔覺得太轟動.因為毒后服藥過量而死十分正常.當然,暫時仲未確定死因.無論如何,佢既死對整個樂壇都係一件好可惜既事.

點解我會特登講佢呢?因為佢係第二個我認識而離世既外國歌手.第一個係Michael Jackson呢個唔駛講.不過其實我認識Amy Winehouse比MJ早,當然亦熟悉過John Lennon.當年主動嘗試聽英文歌,即Mika出道時代,Amy Winehouse有一首派台歌,正正屬於我收聽既第一批英文歌.之後,都無乜留意佢,就只係唯一呢一首You Know I'm No Good.

Dear Amy Winehouse, rest in peace.

--------------------------------------------------

25/7/11 炎熱

今日跟舅父舅母逛尖沙咀.事隔一年半,終於有機會再遊iSquare,除左高層之後,所有店舖都開張晒.除左樓上既多間特色餐廳及遷入既hmv係賣點之外,UA IMAX戲院更加好unique.(果間hmv都夠晒誇張,門面望上去以為好細,點知越行越入,D碟多到費事掃,就咁一望已經大飽眼福,不過睇落去,新鋪既影碟始終執得比較整齊既.但係商店中間賣衫既位置真係笑死我囉,乜料呀.)

第一次睇IMAX,好期待呢,本身呢個戲院已經好華麗,拎住IMAX專用3D眼鏡,走入傳說中既IMAX house,個感覺好新奇,好想把握機會了解整個環境,不過眼前既大銀幕真係令我目瞪口呆,我都唔知點形容其之大.我估淨係講高度,都有五至六堵門咁高.至於副眼鏡,又大又重,有D難搞...講返正題啦,哈利波特死神的聖物2,大結局既呢集應該係睇過最好睇既,因為正如坊間所講,今集情節好緊湊.我自己都覺得幾緊張,著眼位固然係哈利波特最後會唔會死啦,佛地魔既下場又會點.故事主線好好,無大問題.反而當中一些支節,例如愛情果部分,會唔會太夾硬黎.先係哈利迅速與榮恩個妹撻著,張秋無端端再次出現並當超級閒角.然後,妙麗同榮恩響抵擋敵人之際竟突然親吻,令我摸不著頭腦.無計,書本情節需要,但電影又唔夠時間鋪排.無論如何,我估,咁樣都算完美掛...

之後行活方商場,我諗即使自己或家人都唔會走落呢個地庫商場.但係呢度裝修得真係幾靚,有無想像過自己行商場係響好軟既地墊上行?無意中更俾我發現一間蘭芳園.呢度唔算大,就去左THE ONE,呢度比較似一個現代化既新式商場,但無奈大廈既cross-sectional area太細,得個高字,所以行呢商場真係得個行字,因為一層既商店不多,但有超過十層俾你行,所以我feel到唔好行.呢度最大特色可能係八樓一間賣家居特色物品既商店.果度既裝設同家品幾有趣,我印象中J2安樂蝸介紹過呢間野.

最後返去打桌球,手風好似順D,都係complete左兩次,仲要有一次係入黑波,勁呀...最後食埋Pizza Hut,飽飽的回家去.