DJ SoSo - 饑饉三十2011八小時體驗營－The road to success is always under construction.

箴言

16:23

智慧人的心、教訓他的口、又使他的嘴、增長學問。

16:32

不輕易發怒的、勝過勇士．治服己心的、強如取城。

"DJ SoSo 私家音樂部落"

呢首歌既介紹都唔駛講太多,我只想講,多謝Beyond,寫左呢首歌.呢首不明文既饑饉主題曲,儆醒左你同我. Amani

----------------------------------------

17/4/11 暴風雨下的晴天

期待左好奈,終於黎到呢一日.如果你係我個blog既忠實fans,可能會記得兩三年前所謂既「業績報告」我曾經講過support饑饉營友.其實當時我對呢項由香港世界宣明會舉辦既活動已經有一定既憧憬,不過當時無太大動力去參與,可能因為太細個.

今年,參加饑饉三十既目的.好老實講我個心底都唔係太好.因為有50%係為左攞紀錄做OLE,10%係睇903DJs,5%因為今年饑饉大使係Donald而被佢打動,或者只有25%-30%係真心想支援貧困地區既人民.經過呢次活動,我更發現自己經常以「玩」字去形容參與呢次活動,其實用「玩」既心態,絕對係錯誤既.

於金鐘港鐵站外乘搭專車去饑饉主場,原來以為係旅遊巴,但原來係城巴雙層巴士,班次仲要好密,勁,有幾多人都唔驚載唔晒.

好高興,原來今年係八小時體驗營第一次舉辦,人數因而由過往既三千增加一倍至六千,咁多人坐滿香港仔運動場既看台及草地,場面何其狀觀.我開頭仲擔心緊入到場會唔會無水飲,但原來用場刊coupon可以換一盒豆奶同一支水,早知唔帶咁多水入去.

一大班人先去參與「愛．活下去」體驗活動,我地比三十小時營友玩少一半game.先去睇D展覽,透過鏡子拉近我同貧困兒童既距離呢part幾有趣,好有心思.更令我難忘既係放在地上既幾樽啡黑色泥水,當我地好幸福地飲用蒸餾水時,原來地球另一邊有人係飲緊呢D混雜沙泥既溪水,毫無清潔衛生可言.我地呢D城市人真係有責任去幫助佢地.之後排隊入體育館,都係一D workshops,介紹宣明會於糧食方面既救助情況.

走出體育館,已經落緊微雨.雨係每年饑饉必備既一部分,聽電台DJ Wasabi講,無落雨既饑饉咁多年黎只有兩三次.所以,我自己係預左.只係諗唔到雨愈下愈大,之後就係暴風雨,幸好大會於疏散安排上做得好好,大家都好安全地去到暫避既地方.不過,我覺得大會對主看台營友既安排好差,我明白遇上緊急情況,大會無法一下子作出應變.但係,我都希望佢可以派人定時宣佈目前情況係點丫,總好過成粒鐘置我地於不顧.況且大會方面遇過不少大雨場面啦,咁多經驗,點會連小小既PlanB都無呢?當時苦悶既我同terry都好失望,覺得係嘥左一次咁有意義既活動.更加可惜既係,明明3點至4點係903DJ時間,由DJ們帶俾大家更多既歡樂,果個地球波波都玩得幾開心,但唔夠15分鐘就落大雨.唉,只好說,天文台預測實在太準.

傍晚前既數小時都係漫無目的地等待,坐到好攰.終於到夜晚,有閉幕音樂會.雖然係睇大電視轉播,而且訊號因大雨關係不穩定,但係我覺得都可以了.最好睇係孫耀威唱果幾首耳熟能詳既歌,其餘歌手唱果D未聽過.但之後睇返Hong Kong Toolbar重播,其實都有好多歌係好好聽好感動既.

好感激903DJs出黎陪我地睇直播,陪我地倒數,活動最後一刻,走到舞台前既草地,好熱鬧,大家都好開心.最滿足當然係果班成功度過三十小時既營友啦,恭喜佢地.

走向出口,正打算拎出塞左響斜袋半日既排包,竟見到大會派發肯德基贊助既薯蓉及粟米,嘩,真係意想不到.最中意犯某些不合理校規既我當然把握機會,一邊走向專車站,一邊斯斯然品嚐美味既薯蓉,好開心.(其實全部人都咁做,唔通你仲好似個傻仔咁,餓左咁奈,仲揸住杯薯蓉去搭巴士咩?)

金鐘海富中心大家樂於晚上九時正式被黃衫軍饑饉英雄攻陷,隔離檯四個人齊齊食鐵板餐,大概係因為太餓喇.我心諗,一個鐘之前仲響度捱餓受苦,依家就立即大魚大肉,好現實,無奈地笑一聲.

大概出年都無機會去參與饑饉,不過我相信,我將來一定會再次參加既!加油呀咁多位饑饉英雄!加油呀遠方貧困既兒童!

來!全城饑饉全城愛.