DJ SoSo - 中大開放日Yeah!－The road to success is always under construction.

"DJ SoSo 每一天的主題曲"

DJ SoSo本年度音樂節目將於十月尾完結,以便DJ SoSo有足夠時間整理數據資料,為四周年慶典頒獎典禮作出評選.以下,DJ SoSo將會分享本年度最後一首國語歌曲.

DJ SoSo對呢位咁出名既歌手不太熟悉,但得知不少人喜歡佢既歌,例如王貽興少爺占等,DJ SoSo都想試下聽佢既作品.響Youtube一search,第一首顯示既就係呢首歌.反正我都想快D級社旅行,就播呢首啦!...聽左半首,已經覺得好好聽,有一段歌詞亦很特別.

陳綺貞 - 旅行的意義

-------------------------------------

18/10/10 又熱返

上星期六係中文大學本科入學資料日,對我黎講即係開放日.感謝爸媽咁辛苦陪我爬上山坡,響廣闊既中大校園行左咁奈.(走)入中大一向係我既理想,每次經過大學站,都會「裝」下中大球場,期待在校園遊走一趟,今次終於有機會.如果唔係去補習,我諗我參觀中大既時間唔會只有得兩個半鐘.

一踏出大學站,就係中大一片草地,民主女神像響人群中顯得特別突出.我原本諗住呢度一定有招呼賓客既設施,至少都要搵個人黎派下地圖場刊掛.點知,明明見到D人個個都手抽一袋黃色既紀念品,我搵極都搵唔到果個所謂既詢問處,場地D指示又少,我至係見到好多人.算啦,手上毫無資料既我地咪唯有一步一步走上崇基學院既山坡,漫無目的響校園到處走.好在,咁啱俾我撞到社會科學學系既展區,超多人,可以睇下不同科目既作品,幾有趣.又唔知響邊度攞左本介紹書,呢本野正,足夠彌補我無聽入學講座既損失.本野簡單講述咩人適合讀咩科目,有助自己將來計畫...落番去山路,見到下面個湖幾靚,再走落去影相,哈哈,崇基一向係我最愛既中大校園,既方便又美觀.

時間已經係3:40PM,一路想搵路走,去我想去既大學圖書館參觀,點知竟然撞到崇基既牟路思怡圖書館,我知趕唔切3:45PM到另一個山頭喇,就揀參觀呢間圖書館啦.時間剛好,係是日最後一節專人帶領參觀,約半小時簡介圖書館.呢個圖書館主要擺放神學宗教及音樂類型書籍,我興趣不大,反而令我驚喜既係呢度有齊中小學教科書,睇黎幾有趣...更好笑既係領隊姐姐當正我地係入學生,又話呢度有幾多部printer同影印機,要點用影印機,要記得入錢,我想講我只係中五生sosad...不過呢度有大把黑膠碟超懷舊復古,部黑膠碟機睇落都幾型.

原來唔搭校巴,真係無可能去到其他校園.我地搭白色校巴,無冷氣但開住窗都幾涼,搞笑既係呢種巴士設有企位,仲有STOP制,我諗呢款已經係勁殘唔知歐盟乜型號既舊車.都好快就上到去中央校園,原來呢度先係重點.我急需既地圖終於到手,條百萬大道話長唔長,話短唔短.響化學系實驗室快速望過規模普通既實驗,走上大道,一路慢步,一路睇兩邊既攤位,好快就到呢一邊盡頭既大學圖書館.我聽聞響圖書館前面舊石中間穿過會畢唔到業,講意頭既我當然繞圈而行哈哈.過左時間入唔到圖書館,但睇旁邊既高錕展覽都幾唔錯架,仲可以近距離觀望高錕筆跡同獎牌添.

再搭專車上新亞校園.新亞校園係我第二喜歡既校園,上到黎,已經feel到高處遠離煩擾既寧靜舒適,傳理系無乜特別,走入女生宿舍地下都只有數分鐘,太熱,即刻走返出去.重要景點就出現喇!...「合一亭」!呢度真係好靚呀,咁啱呢日天陰有霧有煙霞,由高處望落去科學園吐露港,實在太令人讚嘆喇!...前面係平滑既水池,大把人排隊影相.我覺得,唔走上黎呢度一趟,唔算真正到過新亞,甚至唔算去過中大.

唔搭車,搭升降機落山都係幾有趣既選擇.唔夠時間,無法聽任何講座,無法走上任何一棟大樓睇展覽,一切都好表面咁簡簡單單望過下.就搭專車離開lu.我唔制呀,我出年一定要早D黎,我好想聽果D入學講座.