DJ SoSo - 一捷－The road to success is always under construction.

"DJ SoSo 私家音樂部落"

早幾個禮拜前又搵返呢首歌.陪我成長僅有的數部卡通片之一,至今仍然係我最愛既卡通片《日式麵包王》,第一首主題曲. ホウキ雲

每次聽到呢首歌,我腦海即刻構想開心,晴天,希望.我唔須要理會歌詞既意思,淨係聽個旋律已經覺得呢個音樂好正面,好積極.將呢首歌送俾所有灰心失落既人.包括今日發生8.9級大地震既日本全國朋友,特別係受地震海嘯影響既受災者.我僅在此送上無限祝福,盼望當地早日回復正常.

Proverbs

14:13

人在喜笑中、心也憂愁．快樂至極、就生愁苦。

----------------------------------------------

11/3/11 晴

經過去年既經歷,今年其實我唔太想寫班籃既事.當時我無諗過,響自己既地方寫自己所諗既野,竟然會對不少人有影響(除左班籃,仲有好多不同事情,都係咁).我唔想再引起任何誤會,令到大家唔開心...解決辦法係有,就係寫左一本真實既日記簿,不過我唔中意寫字,好懶.因此,我選擇遇上敏感爭議時封口.響自己「地頭」仲要封口,呢種自我審查既機制未免太諷刺.但,事實就是如此.

星期四班籃第一場,呢場人人都話高form會嬴梗低form,我就抱審慎樂觀既態度啦.實力係強,但萬一輸左個勢,俾低form食住上,輸埋個陣就大鑊.結果,正選各人都打得好好啦,比數一早拋開,已成大局(最後好似係嬴32比9).我呢D屎波後備,上場都係替補休息既正選啫.我始終都唔慣打比賽既氣氛,同平時玩鬥波截然不同.最後打得唔夠三分鐘,零入球係正常既事,好彩都試過起手,星都話ok.咁就好,我會嘗試再落力D,希望星期二下一場會有進步啦.

我其實唔太熟悉賽制.總之,今場係第一場勝利,第一次祝捷.盼望會有第二次祝捷,第三次,第四次...