DJ SoSo - 黃大仙祠太歲元辰殿－The road to success is always under construction.

"DJ SoSo 私家音樂部落"

聽左一排本地廣東歌,又係時候聽下外國作品.帶黎呢位聲線甜美既歌手Marit Larsen,有佢既新歌,If A Song Could Get Me You.聽聽下,會不經意地聯想起Lenka,佢地兩個唱出黎既feel好相似.

Proverbs

10:4

手懶的、要受貧窮．手勤的、卻要富足。

------------------------------

25/1/11 不太冷

題目雖寫明地點,但唔代表我有去過果度既.新開幕黃大仙祠太歲元辰殿,給我既入場意慾不大,但確實有點吸引我,又好似幾有趣既.例如睇下果度D燈光,環境,神像面前有煙噴出呢D特技都幾科幻.不過,直至現在,我自己對佢既整體觀感都係差.

都等左兩三年,我原本以為嗇色園係修葺大殿,但原來係響大殿底下起一個新殿,咁我就真係有點懷疑,到底有無需要興建新殿呢?呢兩三年,善信都要逼入隔離既道堂,人山人海,個個都心握一大扎香枝,逼住前面既人前進.真係幾得人驚,驚既係D香灰掂到自己,燒穿件衫就唔好啦.

細細個入黃大仙祠,的確有點反感,因為真係好逼,D煙鼎盛到令人不斷流淚,眼睛係睜唔大,要戴太陽眼鏡先掂.不過依家諗返,其實都係出於善信既誠心.善信們總有方法(包括等候)爭到一個小四方形既位置跪低拜神求簽,每年新年都係咁.

依家新殿開幕,我反而感到宗教既意義出現褪色了.淨係入場費要100元已經係個問題,雖然話要保養,但係都唔駛咁多掛.其實黃大仙祠一向都有不明文指示既"入場費",善信每次上斜路轉左進入,都會投放一兩元硬幣落東華三院(或嗇色園)既善款收集箱,啪啪聲(硬幣撞擊鐵箱)不斷響起.我相信,既然善信有心參拜,就應該讓佢地隨意捐款結緣,講心唔講金.所以,暫時我都係對100元入場費有所保留.

至於300元攝太歲,我開頭都覺得好貴,但聽家人講,原來300元係合理價錢,所以我無意見.300元攝太歲就可以順便觀賞埋出煙效果,比以前有新一番體驗.

無論如何,我覺得新殿建成後,會跟我童年憧憬既黃大仙祠愈來愈差異.細細個眼中既黃大仙係好人,會幫助人.依家,真係意想不到會講錢.唉.

黃大仙祠共同推行儒釋道三教,對我黎講已經好厲害.但睇黎我都係較接受車公廟,車公廟既管理質素唔錯.至於真係講到拜神既方面,我就真係唔太熟識喇,亦不想響呢度提及.到底元辰殿支持度高定低,去到大年初三就知.