DJ SoSo - 科技大學短途遊－The road to success is always under construction.

"DJ SoSo 私家音樂部落"

29/1/11 高處不勝寒

自從去年暑假因友人Monivious而留意起Mariah Carey後,我反而更加喜愛對我黎講無乜分別既Leona Lewis,因為佢有較多我喜歡既歌.都好難一次過分享晒,其實只要響youtube一search,邊首歌多hit rate,質素都唔會差.今日就推介一首近期先發現既好歌.Better in Time

今朝一大早,同sunny坐火車去鑽石山轉91M巴士去偏僻既香港科技大學.去到鑽石山先發覺預期錯誤,根本就無人會響呢度搭車上去.早知就直接坐74X啦撞鬼.好彩,最後都趕得切入場.四年新學制課程簡介講座.講既野七成我一早就知,或者係早前週會講過.不過都得知到多D大學讀書既情況,例如學分制,講者清晰地講完之後我都唔太明,聽sunny話好似係每個禮拜上兩日堂就可以合資格畢業,或者我應該好似隔離位太太咁用筆抄低...原來大學可以讀兩個主修架!我真係今日先知道,以前聽人話讀一個主修及副修一科,我覺得佢地好犀利,乜同時主修兩科唔係比淨主修一科辛苦得多咩?

科大其實真係唔大,我之前響地圖check,發覺宿舍佔地好似比學術大樓仲多,心知不妙...黎度大樓中央,確實幾空曠幾廣闊既,大樓少少colorful,有少少大學feel咁啦.不過我估響呢度讀四年,我會俾呢個校園悶死.走入大學書店,D書果然好pro,不過D野反而賣得貴D,我諗都係要靠學生會.走出校園,又見到呢個科大標記,我其實唔知佢叫咩名,只係覺得佢表面有刻度,好似間尺,好得意.臨走仲見到一班學生著住齊整既西裝,響標記前扮pose影相,幾型.

我從來都覺得自己做某D事情上會放錯focus.今日又係另一例子.搭緊91巴士落山途中,我一邊響腦海記錄著巴士行走路線,注意91同91M既分別,一邊反思今日兩小時半既行程既目的:
20% 出席講座
20% 考完試做完SBA想立即去街
30% 參觀科大
30% 見至少六七年無去過清水灣果邊想遊車河

原來去科大同遊車河佔既比重一樣架喎,咁其實我可以唔駛專程上去,求其搵架巴士搭就得啦!哈哈.

後記: 唔好以為我講笑,我真係將條路線(由科大到鑽石山)記得一清二楚,91及91M兩者響該段路程既分別就係91舊線行舊路(清水灣道),而91M新線轉行新路(新清水灣道)...今後,我一定分得清淺水灣(Repulse Bay)同清水灣(Clear Water Bay)喇!