(觀看神秘節目，適合以神秘音樂襯托…)
《詭異怪嚇》第1集---冰賓波「智」破冰賓鬼
長頸鹿： 開節目前，先進行詭異儀式，就係：改名！！！本節目第一神怪，改節目名！
鬼線人： 大家唔好奇怪，呢個節目係叫「詭異怪嚇」，唔係「踩過怪」！歡迎大家收睇呢個客串節目。除左鬼線人，仲有長頸鹿giraffe~！
長： Hi！o係呢個作狀靈異節目，我地會訪問江湖靈道之士，又會解答大家疑問，教大家招數抵抗妖魔！
鬼： o係呢個神秘既第五個星期四，我地有嘉賓主持---冰賓波道士！
* * *
{PART ONE 靈怪法寶}
長： 冰仙人！今日有咩介紹俾我地觀眾，可以抵擋鬼怪？
冰： 今日，我，冰賓波！呈獻！(長頸鹿偷笑) 眼罩耳塞套裝！
鬼： (陰笑) 哈哈哈…(忍笑)
長： (笑言) 係！仙人！請問有乜用呢？嘿…
冰： 當你見到鬼或者聽到恐怖聲音，就戴上眼罩同耳塞，咁就乜都唔驚啦！
鬼： 咁，如果聞到鬼既氣味，又點？
長： (爆音) 鬼既氣味？哈…你講咩呀？…
冰： 咁…(猶豫)
鬼： 係！道士請講！ (細聲)睇你點死！嘿！
冰： 咁…(突然冒出一句，大聲) 閉！氣！
鬼： 嘩！哈…好！好！(拍手)
長： 多謝你今日呢件…哈…法寶！…(拍檯) 哈！…請問呢件野幾錢？
冰： 每套都有在下親筆簽名，足夠抵抗妖魔，買一送二，只售$888！
長： …(dead air) 都係算啦…如果你地觀眾想要…(細聲悄悄)俾我就唔要…(大聲)歡迎在此留言回應！
鬼： 唔要都可以留言架！俾我地有個記錄參考…唔該晒大家同埋師傅！
長： 我地休息一陣，下面有廣播劇，一陣再會！
* * *
{PART TWO (搏打短劇)見招拆招}
[鬼線人 飾演 阿強 長頸鹿 飾演 阿權 冰賓波 飾演 驅魔人阿榮]
(深夜的山頭道路上)
榮： (生氣) 都話左搭車走架啦，行咩路丫，依家盪失路，點算？
強： (驚訝) 嘩！你睇！彊屍呀！
長： 咦？係喎！佢地成班走緊過黎呀！點算呀？
榮： 唔駛驚！你睇下佢地點行路？
權： 佢地咪好似電視入面既彊屍咁，伸直對手，跳下跳下跳緊過黎呀！…
榮： 只要我地走過去撩佢地「加拿大」，簡稱腋下…咁…佢地咪俾我地整死囉…
強： 佢地唔會反抗咩？
榮： 佢地跳前跳後，我地踎低整佢地，佢地咁生硬，實整死佢地啦！唔駛驚！
權： 咁我地衝上去囉！
[究竟呢班傻仔可唔可以戰勝彊屍？歡迎大家於本節目回應區留下故事結局。]
* * *
{PART THREE 靈「格」PHONE}
鬼： 好！返到黎，我地會有解答觀眾問題既環節，依然有…
冰： 冰賓波！
鬼： o係度架…即刻睇下觀眾有咩疑難！
長： 呢位係蜜蜂王，佢話如果唔想蜜蜂比D鬼怪騷擾，阻住佢地交配，可以點做？
冰： 我諗…就算有鬼，佢都會整你先，點會搞蜜蜂丫…
鬼： (驚叫) 嘩！你咁樣講野？！咒人？！
冰： 我只係講個事實啫。你贊住D蜜蜂，不如顧下自己啦！
長： 好！讀埋最後一封留言…
冰： (驚奇) 得兩封咁少？
長： …新節目，係咁架喇…
鬼： 明仔問，佢見到個旗袍女鬼企o係條街，要明仔帶佢返屋企，又佢俾利是。點算？
長： 睇黎佢十萬火急，大師！快救佢！
冰： 即刻帶佢搭的士，去將軍澳電視城，古裝外景場地…
鬼： 跟住呢？
冰： 擺低隻女鬼o係果度，叫佢自己o係果度搵屋企同利是。之後即刻叫司機掉頭走！咁咪得囉…係咪好橋？
鬼： …又係既… (無奈)
長： 希望幫到明仔手啦！多謝冰賓波道士！得閒飲茶！
冰： 係！係！
* * *
長： 農曆新年年初四，講鬼真係大吉利是！
鬼： 唔緊要，呢個節甩似講爛gag多D~ (些微怨言)
長： 呢個客串節目要於4月再同大家見面！
鬼： 如果大家大鬼怪疑難，又或者對本節目有任何意見，歡迎在此回應！
長： 再會！
* * *
[本節目只反映主持人及個別參與節目人士之意見。]
[故事純屬虛構。]
主持： 鬼線人 長頸鹿giraffe~
顧問 / 嘉賓主持： 冰賓波道士
製作： BB娃娃菜~
留言列表