DJ SoSo - 糟透了的奧數課程(2)－The road to success is always under construction.

"DJ SoSo 莘莘學子開學特備音樂節目"

「莘莘學子又聚一堂......」由2006年9月1日開始,每年的今天,學校仝人都會唱這首例牌歌曲.趁開學,我倒想播放以下這首歌,是幾年前TVB電視劇"青出於藍"的主題曲---開學禮李克勤.

-------------------------------------------

1/9/10 炎熱到喊最憎著校服 (溫馨上課天報時: 再報就俾樓上既DJ SoSo打喇仲唔執包袱走?!)

繼續寫奧數課程.今次我主要寫我既咁多位導師,寫下最後一堂測驗既感受,同埋上課地點.

呢個課程都算得意,每個範疇都有唔同既導師,有教得好慢好悶既某校長,有聽佢講書都幾舒服既某博士,仲有一位響最後一堂穿魯域斯基球衣既肥仔教幾何.不過,我想寫既人係英皇補習名師koopa koo.佢係我見過咁多位老師之中最不羈既一位.第一次上堂,先遲到半個鐘,然後上左15分鐘堂,猛話好熱,係咁搵冷氣個制,跟住計計下數又爆個「頂」字出黎,哈哈.聽佢講書,無其他既咁悶,點都有十幾分鐘係講其他野,從佢既語言動作,我完全睇得出佢係補習老師,不過佢有D topics都好out下,依家仲講"草泥馬"?雖然佢講周星馳笑片講得幾津津有味,不過我都覺得有點old school.唔緊要,最重要係好聽就得.最後一堂,佢可以中途落平台買麵包返課室,一路響白板前左右徘徊踱步,一路分享自己既經歷,一路食住件三文治,一路講書.嘩,我真係大開眼界.補習老師往往係有種魅力,吸引住我.有關佢既資料,我都搵左小小,原來佢會補小學奧數,點解我小學唔去搵佢呢?...不過佢要真人LIVE教授,最近都要去旺角,任佢響課堂上點宣傳,對我都無任何作用.
http://www.kingsglory.edu.hk/kge/teacher/KP.asp
http://www.kge.hk/kge/pm/tutor_kk.asp

其實都有點後悔參加呢個course,我本來諗住增長下知識,學下新野,但當我黎到第一堂,得知course背後有咁天大既目的,我都唔知用咩心態去上堂嘞.可能係我疏忽啦,無留意詳情就報名,但係我真係無諗過讀幾年,再走去做香港代表隊喎.我只係小小既角色,國際性既事務,幾時輪到我?學院不准學員於網上談及有關測驗之內容,咁我就寫下測試果三小時我究竟做緊D乜.頭一小時我真係花心機去做,不過大量不等式公式始終記唔入腦,上少兩堂搞到幾何又完全唔識,唉,算喇.之後果兩小時,我頹到去諗其他野(其實旁邊仲有一位頹友,仲HEA過我,竟然拎轉頭望街景?!).話說大會派發三張草稿紙,我夾埋只係用一頁,其餘唔係空白就攞左黎做其他野.做咩?當我好似出面果位監考職員悶到爆炸果陣,第一樣野諗到就係溫習去年知識.第一時間背返晒econ果D graphs出黎,咩tax呀subsidy呀,嘩,好好彩,我爭D唔記得點畫,不過最後都係俾D graphs搞到一塌糊塗.跟住求其作條微積分d左次數.之後又嘗試推導physics motion四式(最後一步唔成功poor),最後再諗通識專題研習主題,狂畫mindmap,但到依家都仲未有適當題目.我希望隔離好位見唔到我張草稿紙啦,我諗當佢唔小心望見我張紙果D econ demand-and-supply graph,實嚇死佢.

課堂生活就唔嚮往喇,不過我始終都中意搭車返學,而且呢個環境好relax好fresh好brilliant.由窩打老道望過去,只會見到黑黑實實既一座野,但原來走上去,個環境都唔差.最顯著既係當地既保安,每經過既一扇門都有保安幫你打開,好似酒店咁.響平台望上去,我覺得東西座既結構造型都非常有層次感,好有現代feel.呢種感覺,響我接近兩年前第一次去果度時已經感受到,當時無拍低相,今次一嘗所願.更加正既原來係課室窗外風景,最後一堂我坐最後,拎轉頭望,嘩,好靚呀,隔住又一村,我好清楚可以見到獅子山獅子石,仲望到廣播道商業電台既一角,最正既係我居高臨下,睇到晒又一村陽房別墅既屋頂同花園同泳池,哈哈.

我諗呢次經歷最難忘既反而係放學步行去窩打老道搭巴士返屋企,"九龍塘港鐵站"呢個八搭車站,我好似未試過響呢種車站等車,有車到要揮手示意,但當你以為叫停巴士,又會發現原來身邊好幾位人又係搭同一部車,仲有D人響唔知邊度走出黎.更加大問題既係我總係等唔到72X,結果迫住搭較貴既271,仲要企住返新界.有時我都覺,不如搭番港鐵算數!

睇到以下圖片,可能有人已經知道呢處係咩地方.呢度叫做: 教育局九龍塘教育服務中心.