DJ SoSo - 福兔迎春－The road to success is always under construction.

"DJ SoSo 私家音樂部落"

大年初七人日,想送上王菲所唱既"人間".王菲響香港開演唱會,門票要成千蚊,盡顯天后功架.我並不熟悉佢,聽佢既歌都只係揀果幾首,例如"紅豆","償還","愛與痛的邊緣","曖昧","我願意"呢D.前年播過"約定",今年點唱"人間",祝大家人日快樂!

--------------------------

8/2/11 暖

新年一項重要任務係去拜神,亦即係電台宣導聲帶所指既「參神轉運」.我寫blog咁多年黎都無將呢D事寫落blog度,原因係同學既信仰不同,我又唔太想將咁私人既野公開.不過,呢一兩年都睇開左,聽電台先知原來當奴都響年初一去拜黃大仙,我諗,從純粹參觀既角度寫,應該無乜問題丫.今年廟宇多左新建築,我都想寫下.

大年初一團拜後到文武廟,年初一拜文武廟原來不知不覺已成為我既習慣.應該都係呢幾年既事,唔知邊一年既年初一,諗唔到去邊,忽然話去文武廟睇下,入屋叫人入廟拜神,結果每年總會去一趟.香火鼎盛,一扎香,一點善款,合上雙手,誠心敬拜祈求,保佑學業進步,歡喜滿足.

黃大仙係年初三必去既老地方.早去唔駛響門外打蛇餅,上到平台,我發現俾人跪拜既地方少左好多,希望全面裝修後會多番啦.成炸人湧晒上去大殿,個個手揸一扎香,互相逼埋一齊,當時我都幾驚,好擔心四圍既人D香會插中我件新衫,從中間既求簽區望出去人群,場景其實有點恐怖.其餘都無乜點變,好似上年咁,又要兜個圈入番去解簽中心.離開大門,望去大門旁進入新落成太歲元辰殿既通道,淨係見到兩名職員棟響度,不以為意.

年初四先去車公廟.今年既攤檔好似多左,從側門進入,車公廟依然保持空間闊落既形象,手持三枝線香入殿,發現旁邊有個counter,話放咩咩燈之類既野,仲有兩邊新建既殿,都係第一次見.黃大仙個新殿講左幾年認真大陣象,車公廟反而唔聲唔聲裝修好.原來又有一個拜太歲既元辰殿,仲同黃大仙不約而同多左個財神殿,呢度名為福祿宮,不設香火供奉.再走出去,轉完風車再敲三下大鼓,拜神程序完成.今年,我見到多左年青男女(香港人)黎到拜神,我唔知佢地係純粹參觀,定係真係有新年拜神習慣,定係前一兩日睇完電視節目介紹突然想去,無論如何,如果一個導人向善既宗教可以傳揚俾新一代,而新一代又樂意接受既話,我身為旁觀者,甚至乎當中的一份子,我都覺得幾開心...不過我又見到幾個年青人揸住相機企響門口度不斷影,我又有D反感.又唔可以話影相係亵瀆神靈咁嚴重,相片的確係文化傳承的一個好工具,但係佢地揀呢個時候黎影相,會唔會阻到其他真正想拜神既善信呢?善信又係咪真係想自己被攝入鏡頭當中呢?呢D都係值得深思既.

我從來都相信各宗教係可以和平共處,唔需要話哪一邊先係真正獨一,心裡舒服就得.你見我寫完道教,竟然押尾整句箴言就知啦.

Proverbs

10:17

謹守訓誨的、乃在生命的道上．違棄責備的、便失迷了路。