DJ SoSo - 兔年來臨－The road to success is always under construction.

"DJ SoSo 私家音樂部落"

故事已講返到去年十一月,話說我籌備緊音樂節目頒獎典禮,碌大對眼,搵黎搵去都搵唔到呢個歌手名字,原來舊年我無播過佢既歌呀!雖然佢既歌都係國語,但係有兩三首我都好中意既.可能呢D歌係舊歌,所以我忽略左佢啦.唔緊要,最近佢有一首唔錯既新歌派台,叫做"因為你".

淨係聽音樂就知係方大同所唱.我並唔熟悉佢,但根據我既少少經驗,我個人覺得,佢既歌係輕鬆中帶點悠閒,悠閒中帶點輕快既節奏感,輕快中又帶點開心,開心中又帶點自然既規律美.網上仲有人覺得係溫柔添.總之,佢既歌全都好抒情.最啱weekend在家休息或者郊遊時收聽.

----------------------------------

5/2/11 晴

新一年,我都唔祝大家「吐氣揚眉」咁濫咁食字喇,就貪心一D,祝願大家心想事成啦!...要錢有錢,要學業有成就學業有成...哈,邊有咁易.

年初一,慣例開年飯,然後成家人賭錢,今年太多人,要開兩隻檯泊埋先夠位,笑左.以前一向玩「魚蝦蟹」,可以自己揀格仔有趣D,起碼知道自己控制自己既命運,輸都輸得心服.今年玩「三公」,純啤牌計數遊戲...擺錢,派牌,開牌,收錢或輸錢...無咁好玩,雖然嬴面的確高D,對於賭注較大既大人係大上大落,對於每注落兩蚊既我就係穩健基金.本來帶左三十幾蚊,最後都嬴左半份賭本,唔錯.

年初二,到了舅父家團拜,好多謝舅父送了我中島美嘉既STAR,下一步就係預算買joey演唱會dvd喇...整個下午用黎打麻雀,除左坐埋一邊學打麻雀外,我亦有機會落場打八九十鋪,仲幫舅父嬴左兩鋪添哈哈.一年只有一次機會打麻雀,我諗我D技術好難有進步喇,今次學識雞糊同對對糊既分別,又get到少少開牌東南西北風既意思,都算係咁...夜晚,睇住(電視熒幕中的)煙花食盆菜,好飽呢~

年初三,去到黃埔呢個九龍唯一長期冷清大型戲院,估唔到都咁多人.去左睇「最強囍事」,原本我以為呢個名怪怪地,但聽見家人話有黃百鳴,諗諗下,咦?係喎,舊年都有一套「花田囍事」啦...「最強囍事」呢套戲我真係唔識形容,係騎呢既,但有D情節又真係好好笑,係全場觀眾喪笑,我自己都「中」左上前捧腹大笑.例子係杜汶澤買快餐時將信用卡拍落八達通讀卡器(話說呢個scene未出之前我見杜汶澤攞荷包出黎,我已經估到佢想點,即刻笑左,然後果然有呢個scene,全場先有反應,我覺得自己真係好有前瞻性),以及古天樂甄子丹黃百鳴鄭中基四人打麻雀一幕...另外,我認為杜汶澤扮女人唱「忐忑」可以cut短,因為真係好煩...成套戲,幾中意古天樂既演出,一時man一時gay,行路姿勢最搞笑...仲有呢,我稱呢個故事為「港產片新式分拆橋段模式」,睇過「保持愛你」就知,呢套戲又係分開三個支節敘述,其實我唔中意呢個方法,因為我睇戲係想睇一個完整故事,而唔係睇三套半小時既迷你電影.好彩「最強囍事」呢套戲既編劇將三個支節用盡方法屈番埋一切,俾我睇到共同點,都過到我心目中果一關既.ok啦.

其實新年仲有個mainpoint係去拜神,不過年初三太多人,仲未去車公廟,有機會再寫.

Proverbs

10:12

恨、能挑啟爭端．愛、能遮掩一切過錯。