SoSo Blog四周年感言－The road to success is always under construction.

欲哭無淚喊包豬特約：

《SoSo
Blog四周年感言》

歡迎你黎到soso blog！我就係呢度既網主SoSo。踏入第五個年度，我其實同過往既感覺差唔多，所以無乜野寫。今年暑假忙碌不堪，甚至打消左我既樂趣。結果，咁啱暑假有一日做晒個人功課，有多出來既時間，我就用左一日寫左三個慶典節目既草稿，破晒我寫劇既紀錄，一切都過得好快。

無錯，的確好快，連呢篇本應該十一月發表既文章，響八月頭已經寫好，響現實生活中，我既生活都過得好快。從中一開始寫blog，一寫就寫到中五。響呢段時間中，我身邊有不少人跟隨我嘗試寫blog，不久就放棄左。亦有一D人隔左兩三個先寫一次，我自己都曾經開左第二個Yahoo! BLOG，但寫左唔夠十篇文章就停左。仲有一D人寫寫下突然無理過個blog，過多排突然響第二度開個新blog。我明白要堅持唔易，亦可能因網站服務商或blog功能不適合不方便而要轉地方開新blog。但係，麻煩負責原本個blog既人，最後都俾D責任人。你要知道仲有人每日click入你呢個已經荒廢既blog，期待你更新網誌。所以，如果你決定唔寫，請你認認真真打篇完結既文章，話俾瀏覽者聽。咁做，不但係對其他人同支持者負責任，更係對自己既一個交代，俾自己完完全全開展新階段。

人愈大，睇事多左，寫既野都有所不同，都唔好話依家同四年前既分別嘞。同依家咁寫實既日記相比，我覺得四年前既自己真係幾低B，幾幼稚。不過，當時寫既野係七彩繽紛同簡單D。當時，我會將不同段落既文字添上不同顏色，仲有字體大小粗體底線同highlight。依家，文章花樣少左，不過就多左圖片影片。今年同上年既分別都大啦，上年用盡我既腦筋同玩電腦既時間，無無聊聊就創作出唔同既blog劇或者環節。雖然仲係有D低能，不過係我最滿足，blog最豐盛既一年。我亦靠上年個主題打響名堂，成功吸引不少訂閱者。今年只有日記，配以個人音樂節目，我做得好舒服。響呢個節目寫下虛幻而真實既感想，自我表演內心情意，可以將我平時連日記都唔會或唔敢寫既野一一抒發出黎。當然，因為呢D內容被編入音樂環節中，當有人問我內容詳情，我可以簡單回答一句：「幻想，虛構作出黎啫，假既。」哈哈。

過左一年，我都係懷念去年「蘇撕樂園」呢個主題。今年二月，當我結束「新彊鴨仔團」後，我曾話自己會封筆。不過，其實二月我已經開始構思第六套blog劇，並於三月開始寫第一集。可惜，因為日常生活忙碌，原本諗住全套四十至六十集，於四月頭寫左四集半之後，我就無再理佢。我一直都好怕自己做事三分鐘熱度。本來呢套劇可以於依家慶典作頭炮發表，不過睇黎，連出年有無機會寫好三分之一，都成問題。未來仲有一件叫「中學文憑試」既the best damn thing，我估最有時間寫劇，會係2012年既暑假，慘。

最後，我希望大家享受埋餘下落黎慶典既環節，繼續支持我既blog，多多留言回應，多謝。明年五周年慶典舉行時間或許有變異，部分慶典節目有機會更改發佈時間。所以，大家要密切留意明年soso blog既公佈。

於2010年八月頭寫好既感言，完。