DJ SoSo - 當歲月偷走歲月神偷時－The road to success is always under construction.

"DJ SoSo 週末晚的音樂節目"

(以下內容涉及電影"歲月神偷"(Echoes of the Rainbow),敬請留意.)

18/4/10 霧

依家寫"歲月神偷"好難太遲,就算播都係有Dout,唔緊要啦,好睇既戲同好聽既歌係經得起時間考驗.之前一直都唔覺李治廷所唱既"歲月輕狂"特別好聽,不過當我睇緊套戲,聽埋D背景音樂,就大大改觀喇...搞左呢個環節咁奈,我都唔知到底有無人會一路播呢首歌一路睇呢篇文章.我希望今次睇緊呢篇entry既你可以click條youtube,聽住首歌,睇下文.

naughty girl羚殷告訴我呢套戲開頭搞笑,後尾感人,好哭.我係個好眼淺既人,所以我打好心理準備.果然,呢套戲以一家四口既簡單生活故事做骨幹,由全家最小既小學生羅進二為旁白,故事當中最大既情節係大哥羅進一與Flora相戀,之後大哥患血癌,幸得響臨終之前見到父母,同埋從外國返黎既Flora,卻不能見到同自己友好既細佬.學業同運動健將既生命就此完結.

故事個個都知,唔寫咁仔細.我想講下我既睇法.

從故事中醫生驗出大哥患血癌開始,我已經知道跟住既路線會係點,當然,我係好希望大哥最後無事,不過可惜,劇情最後都係要佢死.我幾乎一早肯定左個情節,不過都俾吳君如同任達華既演技感動到,尤其係任達華之後響教堂振住手播大哥生前既錄音帶,我眼淚都差唔多流出黎.講真,李治廷同埋蔡穎恩

既演技並未完全稱得上優秀,但係都帶到青春浪漫既氣氛出黎.

至於故事方面,呢套戲有一個特點,就係劇情中唔係有一個specific point令我感動想喊,而係一路鋪排兄弟愉快相處一路走向大哥結局當中既過程,令到我眼濕濕,可能係太投入啦,或者係因為我無弟弟既關係.如果係有佈局咁使觀眾感動,咁已經係perfect.電影最後一個shot係細佬長大,竟然同大佬一樣樣貌,其他觀眾竟然笑,我就笑唔出lu,依然諗緊死去既大哥.而呢個時候,細佬旁白交代埋連老豆都響大哥死後三年離世,我心諗呢個會唔會係蛇足黎呢?因為劇場無講呢對母子最後點樣生活,Flora呢?都無講.不過呢套戲duration都差唔多兩小時,交代唔到都無計.

媽話呢套戲拍果條街太短,我覺得都ok既,話晒係簡單既家庭故事,無須要好似七十二家咁誇張,只不過,最後旁白帶出故事主旨未免講得太快,仲薰陶響死去大哥既我都聽唔切,只係知道細佬將用黎笠住個頭,心愛既魚缸拋落"苦海".所以,到依家歲月神偷點解,我其實仲未清楚,要問下naughty girl先.

不過講到尾,呢套都係套好睇既戲,故事雖然發生於六十年代,但係對於生於九十年代既人黎講都好有共鳴,可以套用返響現代社會.加上有笑料,有高潮,有愛情,呢套戲確實有資格響國際影展中得獎.歲月已經慢慢偷走緊"歲月神偷"喇,戲院上映次數愈來愈少,誠意邀請大家睇下呢套電影,如有機會,我都想再睇多次!